الشاعر/ فتحى موافي الجويلي.
إسمعنى يا ولدى
وأياك لحديتى ما تسمعهوش
عمر كلامى ما كان مغشوش
ده كلام موزون وموصوف متنسهوش
أوعاك يا ولدى لوطنك تخون
ولتراب بلدك تبيع وما تصون
ده الخاين يا ولدى كافر ومرجوم
وعمر ربه عليه ما ح يتوب
أرض بنصيبك يا ضناى وبالمكتوب
وخلى ليك فى الطيب نصيب
ومتجرحش قريب ولا غريب ولا حبيب
ده الجرح لو أتفتح عمره فيوم ما ح يتلم ويطيب
وكن لخواتك كبير وحن عليهم وخليك بينهم محبوب
وحرص من اللئيم ده مخادع وملهوش ضمير
وكداب وعمره فى يوم ما ح يكون صادق وصديق
وخليك واعي وناصح ودايما وازن للأمور
وابن أصل وأصول طول ما الزمان دوار وبيدور
وما تحكيش مع الناقص
ومتجلش بنفسك مع سفيه أو صغير أو معيوب
وخليك للأدب عنوان
وما تكنش لغيرك كتاب مفتوح
دس روحك جو نفسك
وخلى حزنك جو قلبك
وداوي جرحك بنفسك
من غير متنزل دمعه ولا تعلي حسك
وخليك تقيل وصعب يفهموك
وما تسمحش لحد فيك يعيب
ويغلط حتى لو كان أعلي منك
ما تنسهوش
حتى لو يداك مش طيلاه
بكره خطوتك تكبر وتعديه
وسعتها يا ولدي علم عليه
وردلوا الصاغ صاغين
بس ما تزلهوش
وكمان ما تسامحهوش
خليك دايمآ ابن أصول
وخليك عزيز النفس
عمر ما يذلك فقر ولا جيب مقطوع
وآياك تنام وتنسى سلاحك
فيخطفوه ويحزنوك
خلى سلاحك صاحى
وبرودك على طول مسموع
خلي الديابة تهرب وتغور
ولو لمحت جبان وخسيس
ساكنه الجبانه والقبور مرحوم
وخليك فاكر يا ولدي
عمر الواطي ما ح تعليه
هدمة نضيفة وشوية فلوس
ده الواطي واطي
حتى لو علته الناس والفلوس
وشوفته نجم بالسماء أو فانوس
متأمنلوش _*
