حاجة بحبها

الشاعر كيرلس فوزي 

حاجة بحبها ونفسي اسرقها

حاجة في كل الكون باعشقها

لو الفرحة هتدخل في حياتي

هاتكون هي أول أسبابها

ذي الشمس في كل شروق

بتبدد حزني لما اكون مخنوق

ذي القمر في عز الليل

دي أرق واجمل مخلوق

سبحان من رسم إبداعه

يعادل الكوكب بإجماعه

هدية الخالق علي الأرض

بيفرح قلبي فعز اوجاعه

سبحان من صوره بعظمه

ده اللي في حياتي ساب بصمه

وشه مليان من نور

نور حياتي الضلمه

هرب الكلام من تعابيري

و100سبب لتبريري

القمر ينزلي ع الأرض

ويظهر فجأة يجيلي

انا اللي في الكل بأثر

في وجوده فقدت تأثيري

متقيد انا برباط حبه

ومن الصعب تحريري

لما شفايفه تنطق اسمي

بحب اسمي لما يناديلي

ده توبي بجد اللي انا عايزه

علي قد مقاسي تفصيلي

روحه بقت في قلبي وروحي

ده عشقي وحبي ده حبيبي

اموت يوم انفصل عنك

أو تقوم بتهجيري

عيني منك وقلبي بيحبك

ومن الصعب رحيلي

وبتمناكي من ربي

شريكة حياتي ونظيري

كلك جميلة مافيكيش عيب

مكتوب عنك في إنجيلي

وحيات من رفع السموات

انتي عندي بكل بنات جيلي

واكتر فكرة بتقتلني

انك ممكن تكوني لغيري

بادعي بإحساس يريحني

أنك تكوني مصيري

حبي ليكي ذي ابراهيم لساره

عايز املي قلبك بمسره

وذي رفقه وإسحاق

وانا ليكي دايما باشتاق

وكمان يعقوب وراحيل

يا حبيبي يا اللي انت جميل

بحبك بقلبي المحدود

لكن بقدر مالوهشي مثيل

واللي قولته حقيقة في حقك

وكل الحق مش تمثيل

يا كفة ميزان حب لقلبي

تعدل حياتي لما تميل

وبحبك وهاتعب من اجلك 

تعب يعقوب لراحيل

بتوحشني وانت قدامي

وكأني من سنين عارفك

حضورك فيه فرح وسلامي

انا قلبي خلاص حبك

بخبط بخجل وسكوت

ارجوك افتحي باب قلبك

وذي ما العشق سهرني

اتمني يكون كمان غالبك

وجودك كافي يفرحني

وهرجع واقولها بحبك

واخر سؤال محيرني

امتي واذاي ده حصلي

ده انا محاوط قلبي بميت حاجز

ف اذاي قدرت توصلي

شوفتك حتي من روحي

فتحت في وشك ابوابي

واخترك بقلبي وعقلي وروحي

تبقي كل احبابي

وبفستانك الأبيض

تنوري بيتي وأعتابي

كنت حاجب نفسي عن العشق

وحبك مكانشي في حسابي

حبيتك كلك علي بعضك

عاشق وليا أسبابي

أبرعت في شعري وتعابيري

شخصك بيزلزل في كياني

وبعزف اسمك علي نغمي

بأجمل لحن وأغاني

ولو الزمن هيتغير

هختارك واحبك من تاني

تضحك ف روحي ترجعلي

تحزن ف قلبي يوجعني

وكأنك اختني مني

ارجوك لنفسي رجعني

ظهر عليا الحب وأعراضه

بلاقي نفسي فرحان وانا قصاده

عيونه ورموشه دول شبكه 

رماهم عليا فاصطادوا

لو قابلت في حياتك ضلمه

هاقيدلك صوابعي وشموعي

ولو في يوم اشوف جرحك

هاطيب جراحك بدموعي

يا حواء يا حتي من قلبي

حبيبتي يا واحدة في ضلوعي

باشوفك دايما حواليا

وفي كل مكان محصراني

انا اللي في مشاعري باتحكم

اول مره قلبي يعصاني

واسمع صوته يتكلم

دي اللي هاتبقي صيناني

والعالم بالنسبالي غربة

وانتي ارض اوطاني

لما اشوف حبك ليا في عينيكي

باحس الدنيا ضماني

ده حب ف عشق ف جنون

انتي بطبيعتك سحراني

اذاي عقلي مش فيا

واذاي قلبي مش ملكي

وروحي المفروض جوايا

ف اذاي جواكي فيكي انتي

عايش معاكي بخيالي

يا حبيبتي وصاحبتي وبنتي

محتاج فوق القلب ميه

عشان اقدر احبك لحالك

محتاج قلب يموت عشانك

وقلب تاني تملك عليه

ومحدش ياخد مكانك

وقلب تالت يحس بيك

قبل ما ينطق لسانك

وقلب يغازلك يشاغلك

لحد ما يسبب جنانك 

لا في قبلك ولا هيبقي بعدك

طالب حبك ارتوي بحنانك

العشاق كنت باستعيبهم

لكن دلوقتي باحسدهم

ولكن لما عشقتك

بقيت في الحب سيدهم

انا مش مجروح وماليش ماضي

وقلبي لسه متعافي

ولو في يوم حصل جرحك

ف قلبي للوجع شافي

لو مش هتشيلك الأرض بمساحتها

هاشيلك يا روحي علي كتافي

الحياة من غيرك ولا تسوي

ما انت اهم اهدافي

والناس شوقها للجنه

وانا شوقي لحضنك الدافئ

الشاعر/كيرلس فوزي