أوعى تفتكر الصيام

كلمات الشاعر محمد عبد العزيز رمضان 

أوعي تفتكر الصيام

أكل شرب والسلام

الصيام معناه كبير

أصله إحياء الضمير

إننا نحيي اللي مات

قبل ما نصير ذكريات

نمحي من بينا الخداع

نفتكر كل اللي فات

أوعى تفتكر الصيام

إننا نعطش وبس

لا دا معناه إلتزام

والغني بغيره يحس

مهما عشنا راح نموت

والكلام يصبح سكوت

كل حى راح يفارق

مش هيبقالنا وجود

ابني عمر بالصلاح

خفف الحمل التقيل

هو مفتاح النجاح

الطريق صعب وطويل

أوعى تغفل أو تنام

العبادة مش كلام

هيا نور يجلي القلوب

هيا إصلاح للعيوب

هيا تركك للمعاصي

مش تكاسل أو هروب

أوعى تفرح بالشباب

الشروق يتلوه غروب

السعادة مش فلوس

أو غنى أو كتر مال

أو بإنك يوم تدوس

ع الرقاب زي العيال

السعادة في كلمة واحدة

السعادة في الحلال

وإن خسرت بكرا تكسب

أوعى مرة تقول محال

بالعزيمة راح هتقدر

تبقى أقوى م الجبال