قصيدة غاوي تفتح للحزن يومك

المنيا / ابرام كمال يكتب 

و بحلم بعمري اللي راح 

في وهم بعيش عليه كتير

و مش شايف غير جراح 

و الناس مش بتبطل تعيير

بجد مش قادر اتحمل 

غربه بعيشها و بكمل 

خلاص بقيت بتألم 

ومن الناس اتمليت تكسير

و ايه باقي في العمر تاني 

عشان ينفع بجد يتعاش 

اللحظه الحلوه ف ثواني 

بقيت سريعه مابطولهاش

غاويه الحياه تعذبني

علي شخص كأنه مجاش 

و بداري دموعي بأيديا

وانا بموت كل دقيقة

علي قلب كان فيا 

و فجاه شوفت الحقيقة

انه اصلا مش موجود

ده وهم عده كل الحدود

وطلع عرقيل وقيود 

بيقتل فيا بألف طريقه

و انا اصلا مش حاسس

بختار غلط ميضرش 

اختار صح مافيش 

وطول ما العمر بأئس 

الحقيقه ما تهمنيش 

و طلعت بحب و خلاص

فاضي بقي اعمل ايه 

واللي حبيتها باحساس 

مش عارف سابتني ليه 

مع ان محبتش غيرها 

بس بعد البعد حسيت 

ان بجد من غيرها 

عمري بجد ما حبيت

انا اللي رسمتها رحله 

و في طريقها مشيت

ده كانت كلي الحاضر

والحلم اللي عليها بنيت

فجأه لاقيتها بعيده

و السلام مني غييرها 

مع ان هي الوحيده

اللي قلبي بجد اختارها

لكن راحت و مع الوقت 

كل احلامي بتتهد

انا لما شوفتها صدقت 

ان الحب حقيقي بجد

وخلاص مش لازم استني 

ماهي مشيت بدون رجوع 

واللي كنت فاكرها جنه 

مشيت و انتهي الموضوع

انتي اللي سبتها تمشي 

و تعيش عمرك موجوع 

خيبان يا ابو قلب غبي

بتحب تعيش بدموع 

وتبكي ع العمر اللي راح

و تشكي للوهم همومك 

انت اللي غاوي الجراح 

وغاوي تفتح بالحزن يومك