القرص الطريه ساده وبالعجوه

اسم الشيف /عبير سيد

مده التحضير :15دقيقه

مده التسويه :15 دقيقه

مده التخمير :ساعتين

المقادير

كيلو دقيق

معلقه كبيره خميره فورية

معلقه كبيره بكنج بودر

2معلقه كبيره سكر

2معلقه كبيره زبادى

2معلقه كبيره لبن بودره

2معلقه كبيره خل ابيض 

كوب الا ربع زيت يكون نوعه كويس

ماء دافئ للعجن

للحشو : 250 جرام عجوه مفرومه مع معلقه صغيره سمنه نعجنهم مع بعض ونكورهم كور صغيره.

لدهن الوش :

ربع كوب صغير لبن

الطريقه

نحضر كوب وننزل بربع كوب من الماء الدافئ والخميره والسكر. ونقلبهم مع بعض ونسبهم لمده 10دقايق لحد ما الخميره حجمها يرتفع.

نحضر طبق وننزل بالدقيق والزيت والزبادى والبكنج بودر واللبن البودره والخل الابيض والخميره. بعد ما حجمها يرتفع ونقلبهم مع بعض كويس ونبتدى ننزل بالماء الدافئ شويه بشويه لحد ما العجينه تلم معانا. نبتدى نقطعها كور صغيره على حسب الحجم اللى انتى عايزاه ونغطيها ونسبها لمده ساعه تختمر. 

بعد كده نبتدى نبططها ونرصها فى الصوانى. نخلى نصفها ساده والنصف التانى نحشيه عجوه بعد ما نخلص كل الكميه نغطيها ونسبها تخمر مره تانيه لمده ساعه. 

نشغل فرن البوتجاز فوق وتحت ونسيبو من يسخن قبل ما ندخل القرص فى الفرن بعد ما يسخن. ندخل القرص بعد ما ندهن وشها باللبن فى الرف الوسطانى ويكون الفرن على نار هاديه والشوايه وسط لمده ربع ساعه اولحد ما القرص وشها يوصل للون الذهبى. اول ما تخرج من الفرن نغطيها علشان تفضل طريه.