ابن الشهيد

شعر/ عماد الالفي

أنا ابن الشهيد

ابن البطل الفقيد

حامى الحمى اللى كان أشد من الحديد

برصاصة غدر خاينة وقع البطل شهيد

سابلى دموع عينية وفى قلبى نار بتقيد

ضحكى وأفراحى ضاعوا وفكرى ليل شريد.

وبقيت من يوم وداعه بقيت ابن الشهيد

أنا ابن الشهيد

أبى كان أوفى خلى

وكان شمسى وضلى

وياما كان بيقوللى

حق الوطن علينا نصونه ونراعيه

فرحنا أو أسينا دا واجبنا عليه

وانا شغلتى أحميه وقت الخطر أفديه

مهما يكون التمن

دا أى شيء فى الكون لو ضاع ضياعه يهون

إلا ضياع الوطن

كلامه لسة فى ودنى من يوم ما راح وسابنى

من يومها وهبت نفسى فدا تراب الوطن

فى حبه أموت شهيد

مانا ابن الشهيد

ياوالدى يابطل ياللى غدر اتقتل

أبدا مهما حصل مش هفقد الأمل

أوعدك إنى أحقق حلمك اللى حلمت بيه

واللى ماكنتش أصدق إنى من غيرك أجيه

واوعدك إنى أكون فخر لبلادى وأهلى

واخلى كل الناس تقول الشهيد خلف بطل

بس انا نفسى أشوفك والمس بإيدى كفوفك

واجيب عينى فى عينك واحشنى ومين يجيبك

نفسى أشوفك ياأبى واهنى بيك قلبى الحزين

نفسى أشوفك مرة واحدة حتى ولو دقيقتين

دقيقة أخدك فى حضنى زى ماكنت بتاخدنى

وانا جايلك من بعيد

ودقيقة أبوسك فيها لو حتى أموت بعديها

ولا أعيش بعدك حزين

ماملكش غير دعايا لخالق البرايا

إله العالمين.

يارب ارحم أبى واغفر جميع ذنوبه

واجعل يارب الجنة من قسمته و نصيبه

واحفظ يارب مصر من شر اللى يعاديها

وارفع رايات النصر فوق كل حتة فيها

دا ليلها مهما طال فيه فجر جاى عليها

شـايل أمـل جديـد

بادئ نـهـار سعـيد

ومعاه ابن الشهيد

أنا ابن الـشـهيد

انا ابن الـشـهيد