الراحه النفسيه

متابعة زهرة غزال

أتركي الموبايل من يدك وركزي كويس في حياتك علي ارض الواقع

احضني ولادك واضحكي مع زوجك واهتمي بشغلك وخصصي وقت للذكر والقرأن والعبادة

وانسي المشاكل والنكد والتفاهة لانهم مصدر طاقة سلبية رهيبة 

بلاش وجبات دسمة آخر اليوم نامي خفيفة

هتحسي براحة كبيرة

اخر الليل ده وقتك انتي استرخي واهدي وابتسمي واسمعي انشودة رقيقة

مارسي اي رياضه ولو لمدة ١٠ دقايق كل يوم مع الاستمرار هتحسي باللياقة والانطلاق ده غير شكل جسمك

اللي حيكون فيه الحيوية والجمال نامي وقت كافي طول الليل وخدي نوم خفيف بالنهار

اصحي بدري صلي الفجر وتابعي شروق الشمس متناميش تاني بعد نزول ولادك للمدارس

ابدأي يومك من أوله هتحسي ببركة وراحه وانجاز

اقري كتاب اسمعي محاضرة تابعي أشياء مفيدة

مع الوقت هتُزهلي من تطور شخصيتك

حبي نفسك وأتركي اللوم والعتاب والغيبة والنميمة

حياتك اهم انك تفكري فيها ركزي علي الحلو وكبريه والسئ يااما تعالجه يااما تتجاهليه

اشكري ربك علي بيتك وسريرك الدافي وصحتك وولادك وزوجك وتعليمك

استدعي كل النعم اللي حواليكي وفكري فيها

متقوليش هي عيشة والسلام

وتستني يومك يعدي ورا يوم ده عمرك ودي حياتك عندك حجات كتير عيشيها وافرحي بيها