بقلم: إبراهيم يونس.
انا اسمي ندى محمود محمد علام حاصله على ليسانس آداب قسم علم الاجتماع جامعه المنوفيه انا مولوده ف المملكة العربية السعودية مدينة الرياض انا مولوده فاقده اليدين واعاني من أنحناء ف العمود الفقري والأطراف السفلية اعاني من الطرف الأيمن أصغر من الطرف الأيسر…. استقريت ف مصر وكان عمري ٦ سنين استقريت ف المنوفيه مدينة شبين الكوم قرية ميت خاقان ودخلت المدرسه وانا كان عندي ست سنين وبابا وماما طبعا السبب الرئيسي بعد ربنا ان اوصل لتحقيق هدفي…
دخلت المدرسه الابتدائية مدرسه سيدي عبد المنعم والحمدلله مكنش في اي عائق بالعكس كانو فخورين بيا ماما كانت بتوديني المدرسه هي وبابا وتيته كانت وكيله ف المدرسه هي اللي علمتني الكتابه والقرايه ومسكتني القلم برجلي… واتعلمت ووصلت ودخلت المدرسه الإعداديه (صلاح خطاب الإعدادية المشتركة) ف المرحلة دي كنت أملك كرسي متحرك كهربائي.. كنت بروح لوحدي واجي لوحدي… وحاصلت ف تالته اعدادي مجموع ٢٤٨ من ٣٠٠ ودخلت ثانويه عامه مدرسه الثانويه القديمه بنات وكنت أدبي وبردو كنت بروح واجي لوحدي ايوه كنت أوقات بلاقي مضايقات من الناس بس تمام كانت بتخليني أزيد إصرار أن أحقق حلمي ف الوقت ده مدرسه التربيه الفنيه كانت بتشجعني جدا واتعمل ليا تلت معارض ف تلت سنين الثانوي واتعمل بردو ليا تبع قصر الثقافة معرض ليا وااتكرمت وطلعت التانيه ف مره ع مستوى المحافظة والأولى ف سنه تالته ع مستوى المحافظة ف الرسم وبردو ف التعليم ف سنه تانيه طلعت الخمسه من عشرة الأوائل…
ف سنه تالته حصلت على مجموع ٧٩٪ واتكرمت وقتها من نائب وزير التعليم العالي ورئيس جامعة المنوفية الدكتور معوض الخولي… اتكرمت من ضمن الأوائل الثانويه العامه كوسام لتفوقي … بعدها دخلت كلية الآداب قسم علم اجتماع وكنت يروح واجي بالكرسي لوحدي وبردو بابا وماما كانوا دايما سندي وف ضهري وكان برغبتي القسم ده واتكرمت ف سنه تانيه من الدكاتره كوسام لتفوقي واتخرجت من الكليه سنه ٢٠٢٠..وحاليا بدرس ماجستير في ادارة الاعمال MBA في الكلية الملكية البريطانية وعملت مقابلة مع محافظ المنوفية ..
حلمي أن اكون سفيرة النوايا الحسنة أو وزيرة وصوتي يوصل للرئيس عبد الفتاح السيسي وان يتعمل ليا معارض كبيره وان بردو ابقى من ضمن أبناء المجتمع واشتغل وابني بلدي واكون ليا إسهام أن بلدي تطور للأحسن نفسي اكون فنانه مشهوره.. نفسي أقدم البهجه لكل الناس واديهم امل وان اي فرد من ذو القدرات الخاصه يشوف الدنيا ويشارك ف بناء بلدنا.
