مقدم من الشيف/ عبير سيد
مده التحضير: 15 دقيقه
مده الطهى : ساعه وربع
المقادير
فرخه متوسطه الحجم
بصله مبشوره ناعم
علبه زبادى أو معلقتين كبار
معلقه كبيره كاتشب
معلقتين كبار خل أبيض
معلقه كبيره بهارات فراخ
نصف معلقه صغيره فلفل أسود
ملح
مكعب ماجى
كاتشب لدهن الفراخ
الطريقه
نغسل الفراخ كويس جدا وتقطعيها زى ما أنتى عايزه وبعد كده نجيب طبق وننزل بالبصله المبشوره والزبادى والصلصه والفلفل الاسود والخل وبهارات الفراخ ومكعب الماجى والملح ونقلبهم كويس مع بعض ونتبل الفرخه ونسيب الفرخه فى التتبيله لمده ساعتين وبعد كده نجيب صنيه ونحط فيها شويه ميه ونحط على الصنيه شبكه ونحط الفراخ فى الشبكه بعد ما ندهنها بالكاتشب ونقفل الشبكه ونحط الشبكه على الصنيه من فوف وندخلها الفرن فى الرف اللى تحت لمده ساعه أو ساعه وربع أو لحد الفراخ ما تستوى
وبعد كده نطلعها من الفرن نكون مجهزين فحمه ولعه ونحط الفراخ فى طبق ونجيب طبق صغير ونحطه فى وسط الفراخ ونحط فيه الفحمه وننزل على الفحمه بشويه زيت ونغطى الفراخ على طول ونسبها شويه لحد ما تاخد ريحه الفحم
